嘎訕胡 | 叫人哪能歡喜儂

《 叫人哪能歡喜儂 》

------沈一珠

周末郊遊廣富林，

場所修得赤刮辣新；

就是管理缺根筋，

走路摜煞末人提醒。

朋友新搬到松江，為盡地主之誼，買好票請阿拉大家一道到廣富林白相。本來蠻開心一樁事體，么想到一場悲劇等好勒海。

門口碰好頭，阿拉興沖沖朝里廂走，末想到，就一霎眼功夫，出事體了：只聽朋友太太「唉喲」一聲就摜了地哴：一眼望過去，眼門前有幾踏步台階，整一片台階渾然一體，既嘸末防滑設計，也嘸么顏色、質地的區別，前後左右又嘸末明顯標識搭仔提醒。只看到朋友太太痛得額骨頭哴汗湯湯滴，曉得，搿記僵了。

出去白相，勿當心跌跌摜摜總歸有的，只不過，廣富林的管理態度明顯是勿應該有的：

——看太太痛得結棍，朋友決定先送伊到醫院去，馬上去遊客中心藉手推車。過仔一歇，朋友自家推仔手推車回來了，一個年輕保安跟勒後頭，一面孔輕鬆。阿拉馬上跟伊講，公園管理有問題，就阿拉等勒海搿歇歇辰光里廂，又有三人勒此地跌跌沖沖，其中一個雙膝著地，摜得比較嚴重。

保安倒是見怪勿怪：前幾天還有人勒此地頭頸摜斷了，還是我幫了搬到救護車哴的。不過，這不屬於我們保安管的，跟阿拉講么用。

——勒阿拉的要求下，有用的人出現了，一個白白胖胖的女人，既沒有看一眼傷者，也沒有講聲抱歉，就立好勒台階前頭，一面孔欠伊多還伊少，嘴巴里還勒昂里咕哩：迭個台階哪能啦……

——朋友從醫院發來消息，踝骨多處骨折，醫生要求，立即住院，需要手術。

朋友叫阿拉去遊客中心，讓伊拉出具一個簡要情況說明。阿拉去了，只不過，剛剛迭個女人已經看勿見了，聽說是下班了；其他人儕講，伊拉勿了解情況……

此地有風險，白相要當心。

【滬語解釋】

赤刮辣新：嶄新。

摜：摔。

昂里咕哩：嘀嘀咕咕。