粵語正字：究竟系用「畀」定系「俾」？

近日睇娛樂新聞，知道某香港女明星終於有喜。「ＸＸ最初嫁俾Julian，其實冇諗過生仔……」又系香港多數報紙雜誌成日出現嘅問題：究竟系用「畀」定系「俾」至啱呢？

　　畀，喺粵語入面，系遺留落嚟嘅若干上古詞語中最常用嘅一個口語詞。唔少人寫作「俾」，「俾」者，使也，唔可以通假。所以，準確啲嚟講，呢個系同音誤寫，屬於別字。

　　《說文》：「畀，相付與之約在閣上也。」佢系個象形字，象的系一束紡織物(約)，放喺一個托盤(閣)上面；系古代君主賜與臣僕物品採取嘅方式。因此得出語義為「與也」、「予也」。讀音必至切，如此。另外，據清代著名嘅語言學家、經學家段玉裁講，「畀」重有「夫勿切」一讀，但呢種講法重未搵到例子支撐。其實「畀」最早見《書·洪範》：.「鯀堙洪水，汩陳其五行，帝乃震怒，不畀洪鴻九疇。」又《多士》：「惟天不畀，允岡固亂。弼我，我其敢求位；惟帝不畀，惟我下民秉為，惟天明畏。」又如《詩·小雅·巷伯》：「彼譖人者，誰適與謀？取彼譖人，投畀豺虎！豺虎不食，投畀有北！有北不受，投畀有昊！」

　　秦漢以後，至到明清嘅古籍入面，「畀」仍有使用，不過佢系以古文語詞面貌出現，再唔系口語嘅反映嘞。不過從上引例，就可以知道粵語口語入面「畀」嘅來源系幾咁古老。

　　上文講到香港多數報紙雜誌發現有呢個別字問題，其實廣州本地嘅娛樂雜誌出現嘅情況更多(可以話暫未見過正確使用過嘅)，希望大家多啲留意並正字正用嘞。

推薦閱讀：