《上海往事》3

講到交朋友，又讓我想起了王家宅的王麻斑。王麻斑大小老婆一大堆，小囝養仔十幾個。講起來交關好白相，介許多小囝里廂，幾乎是清一色的女兒。只養著仔一個兒子，大名王少坤，小名三弟，像煞是王麻斑的獨苗一樣。王麻斑寵是寵得來，嘸啥講頭。三弟讀書的辰光，搭我一個班級。三弟到學堂里讀書，完全一付少爺派頭，前呼後擁。我向來看不慣這付腔調的小赤佬，不過也犯不著跟人家計較。彼此一直井水不犯河水。一直到看見三弟調戲儂阿奶，我才忍不住衝上去，抽了三弟一記耳光。

伊個辰光，儂阿奶比我低好幾個年級。每天放學，伊總歸夾仔一隻藍白印花的小書包，低勒格頭，走出校門口。格日仔（這天），正好勒拉門口碰著三弟搭仔他一幫小兄弟。這幫赤佬就上儂阿奶格腔，嘻嘻哈哈跟上去叫伊「阿英」、「阿英」。他們叫到後來，越來越不像閑話。特別過份的是，三弟一面叫，一面走上去，對儂阿奶講：阿英，不要睬伊拉，到我屋裡廂去坐坐，儂看哪能？不等儂阿奶回答，我跳過去，不管三七弍一，一個耳光打上去，打得三弟目瞪口呆。後來，格幫赤佬一道撲過來，拿我撳勒地朗廂，噼里叭啦一頓毒打。當時辰光，學堂里有幾個老師在場。伊拉竟然一個個立勒拉旁邊頭，光是嘴巴里喊「不要打相打、不要打相打」，嘸沒一個人上來替我解圍。

格樁事體發生勒拉大佬倌剛剛去華山嘸沒多少日腳。我雖然經常去見申先生，但是又勿想告訴申先生格種雞毛蒜皮的事體。格日仔（那天）夜裡，正當我困勒床朗廂，翻來複去思量哪能介報仇，外頭有人敲門尋過來了。我娘舅開門一看，只看見王麻斑親自帶了三弟，上門賠禮道歉。三弟面孔朗廂兩面紅腫，不啻吃了我一記耳光，擺明仔還吃了他阿爸的交關耳光。起先，我還勿曉得到底是哪能樁事體，還以為王麻斑大概曉得我認得申先生哦，勿敢得罪。等到王麻斑一幫子人走了之後，娘舅對我講了王麻斑搭我伯伯的交往故事。我聽了方才恍然大悟，這個王麻斑倒還真是個講義氣的前輩。後來我又曉得了，是我娘舅跑到王家宅去告哦狀。

伊日（那天）夜裡，王麻斑叫三弟跪在我面前，直到我開口原諒為止。我起先還勿肯開口，後來是娘舅出來打圓場，拿三弟拖了起來。三弟起來的辰光，不曉得哪能搞哦，鼻頭管里忽嚕一下，流出來兩條鼻涕。我忍勿牢噗哧一聲笑出來了。我格能一笑，三弟也笑了。接下去，在場所有人通通放聲大笑。結果，這場恩冤就格能介笑脫了。第二天，王麻斑派人來接我，到王家宅吃夜飯。這頓飯吃過之後，我就搭仔三弟成了好朋友。

勒拉飯桌朗廂，王麻斑有一句閑話，給我印象極深。王麻斑對大家講：孤兒寡母，是天底下最最不允許欺侮哦。隨便啥人，只要欺負到孤兒寡母頭上，我王某人就要他好看。王麻斑格句閑話，講得我差點眼淚落出來。

三弟搭我成為朋友之後，才曉得我搭申先生的關係。格只（這個）浮屍嚇得來吐了好幾吐舌頭，對我講，幸虧他阿爸請他吃了頓生活（揍了頓），否則窮禍闖得來一塌里糊塗。格只浮屍，後來是跟牢我一道做生意了。我跟儂阿奶結婚的辰光，全部是三弟搭仔王家宅那幫小兄弟張羅哦。王麻斑還送了交交關關禮物。王麻斑勒拉酒席朗廂，還尋我老丈人開心：儂倒是落手快格，搶勒拉我前頭。要不是格閑話，盧家門裡的新娘子，應該是我女兒。

王家宅格幫浮屍，就是喜歡胡天邪地白相。結婚嘸沒幾天，就硬勁拉我去扳魚摸蟹。阿拉鄉下頭格條通到黃浦江里去的清水浜，經過伲盧家橋，也經過王家宅。奇怪的是，偏偏勒拉王家宅格段，魚蟹特別哦多。我小哦辰光，就跟大佬倌到王家宅格段清水浜里，捉過魚，摸過蟹。兄弟兩家頭，赤仔個腳，勒拉官路朗廂，踢里踏踢里踏，沿浜一路走過去。有辰光，還跳到浜里游一段。開心啊。赤腳踏勒爛泥路朗廂，感覺邪氣好。軟東東，滑嗒嗒。春夏之交，還可以采路兩旁的蠶豆吃。不曉得哪能搞哦，後來，我每次聽到笛王陸春齡吹格《紫竹調》，就會想起跟大佬倌走勒官路朗廂，到王家宅去捉魚摸蟹哦光景。陽光明媚，加上藍天白雲；兩旁邊蠶豆花開，田地里還飄過來一路清香。

格種感覺，跟王家宅小兄弟一道，就嘸沒了。講起來，伊個辰光扳魚，排場大得多。好幾隻漁網，勒拉浜灘朗一路排開。摸蟹格辰光，我又根本用勿著跳下去，只要等勒拉浜灘朗，格幫浮屍自會得拿一隻只大閘蟹，紮好仔，從河浜里摜上來。當年，我跟大佬倌去摸蟹格辰光，根本嘸沒格能介派頭。我背仔只小來兮的魚簍，寸步不離格跟勒大佬倌後點頭。看見大佬倌摸到一隻，連忙遞上魚簍，讓他拿蟹丟進去。我自己是從來不敢摸哦，不是怕螃蟹，是怕萬一弄錯脫，誤把蛇穴當蟹洞。

三弟摸蟹，就嘸沒我大佬倌格能介老鬼（讀居，熟練的意思）。我記得格日仔三弟摸進去，讓蛇咬了一口。還好勿是毒蛇，但手指也腫了好幾天。王麻斑後來曉得仔，講了句，讓蛇咬一口倒嘸啥了不起，就是有點勿吉利。王麻斑當然也講不出啥個勿吉利。直到三弟後來跟大佬倌一道去送軍火，讓東洋人的機關槍掃倒勒拉地朗廂，凶兆才應驗。大佬倌也就是因為三弟的死，大開殺戒，殺脫仔毛二百個東洋兵。唉，當初辰光一場相打，最後成了生死朋友。

人生在世，兩樁事體最最大。一是老婆要討得好，一是朋友要交得多。我也算得是個會交朋友的人，但跟申先生還是遠遠比不上。儂曉得伐，申先生有多少朋友？簡直是難以想像。申家祠堂落成格日仔，幾乎天底下所有名動一時的人物，通通露面。有的送匾，有的道賀，有的親自到場。從當朝天子，到當紅名伶；從學界名流，到軍界要人；從工會到商會，從租界到貧民窟；真是人山人海啊，看得來眼花繚亂。光是儀仗隊，就有好幾萬人。不是說大話，就是老底子的皇帝造房子，也嘸沒格能介的場面。隊伍所經之地，全部實行交通管制。浦東的伊條楊高路朗，兩旁邊插滿仔彩旗。格能介的場面，上海開埠以來，從來不曾有過哦。

當年的哈同，上海灘朗廂最有名的洋人，翹辮子（逝世）辰光的葬禮，算得隆重了，也嘸沒格能大的場面。還有老蔣的丈母娘宋家老太太死脫，也算是樁大事體，場面不算小，但是根本嘸沒勒拉上海人的心目中留下啥個難忘的印像。真要講起來，伊個老太太還算是兩朝天子的丈母娘。

唉，可惜的是，伊個辰光，我還嘸沒搭仔儂阿奶去看過《庵堂相會》。要不然的閑話，我一定會帶她一起去開開眼界。勿講別哦，光是三日三夜的戲，就足以讓人永世難忘。四大名旦，梅蘭芳，程硯秋，尚小雲，荀慧卿，一個不缺。老生名家，馬連良，譚富英，言菊朋，紛紛到場。京戲名角到得格能介（這樣的）齊全，史無前例，空前絕後。看過格人後來都說，從此以後，再也沒有看到過格能介的伶界盛會。不過，伊個辰光，我年紀小了點，只曉得看熱鬧，不會得細究韻味。我勒拉申家祠堂里到處亂跑，啥地方熱鬧就朝啥地方湊。我曾親眼看見，阿木林被張學良手下的一個癟三，吃了記耳光。阿木林是和申先生差不多辰光出道哦。四肢發達，頭腦簡單。再加上脾氣急躁，動不動就跟人家用拳頭說話，一向稱王稱霸慣拉哦。哪能曉得，天外有天，山外有山。阿木林也有吃癟的辰光。

申先生能夠在綠林豪傑里鶴立雞群，是有道理哦。要講出道，金老闆比申先生早得多。要動拳頭，阿木林比申先生硬得多。無論是江湖朗廂，還是上海灘朗廂，金老闆和阿木林迭能的角色，一代一代，綿綿不斷。唯獨像申先生格能的人物，空前絕後。從前不曾有過，後來也完全絕種了。啥個道理？申先生做的事業看上去交關平常，實際朗廂深奧得一般人都讀不懂。申先生本人是不是曉得？當然曉得哦。但是他勿會得流露出來。申先生能夠做出來的只是，勒拉穿著朗廂，不像金老闆和阿木林格能殺坯兮兮，時常打扮得文質彬彬。勒拉伊個辰光，上海灘朗廂流行穿黑顏色的短打布衫，腰裡束仔一根寬皮帶，上頭插把匣子槍。但是申先生，從來勿搞格套么事。常年一身長衫，像煞是個規規矩矩的生意人。有辰光申先生還會戴副眼鏡，看上去像個教書先生一樣。

當然啰，申先生跟金老闆和阿木林的關鍵區別，不止勒拉穿著，更加勒拉彼此的見識有高低。申先生的見識，是伊拉兩家頭隨便哪能達不到哦，讓伊拉兩家頭學一輩子都學不會。伊拉兩個只能做做魚市、澡堂、碼頭、戲院、妓院的生意，最多也不過是開賭，或者販鴉片。伊拉做不出申先生勒拉金融、實業、交通、郵政、教育乃至慈善等等幾乎包羅社會各大行業的大事體。伊拉兩個只不過勒拉混江湖，申先生可以搭仔各種各樣的人打交道。我只消給你講迭能個故事，你就知道申先生為啥總是高過伊拉一頭。

伊個辰光上海灘朗廂有個從蘇北鄉下出來混出道的角色，大名張根寶，人稱江北阿寶。申先生他們都叫他阿寶，像我格能小一輩哦，都叫他阿寶爺叔。後來我跟他交情混好了，也跟著申先生瞎叫他阿寶。像阿寶這樣的江北人，好弄起來交關好弄，難弄起來也邪氣難弄。伊拉有辰光比伲本地人出手還要大方，有辰光又會為一分洋鈿跟你翻面孔。頭腦簡單起來，來得格簡單；心眼多起來，又來得格多。真叫是說不像話不像。就像申先生是本地人的驕傲一樣，阿寶是上海灘朗廂江北人的偶像。馬路朗拉黃包車哦，街沿朗擦皮鞋哦，澡堂里搓背哦，十六鋪碼頭上扛包做苦力哦，隨便阿里個（哪個）江北人，只要儂對他用稱讚的口氣提起阿寶，他馬上就會對你眉開眼笑。

不過，如果你要問阿寶本人，他最佩服阿里個人，他一定回答：申先生。阿寶勒拉上海灘朗廂最出名的一樁事體，是申先生幫他做成功哦。格樁事體，勒拉伊個辰光的中國人里廂，勿要講做，就是連想都不敢想。啥個事體呢？就是搭仔租界里的英國當局打官司。英國政府是歷朝中國政府都弄不過哦，申先生有本事弄得伊拉服帖。你曉得迭個裡頭的意思伐？如果申先生搭仔隨便阿里個英國人，比方講，哈同，打贏一場官司，不過是贏了一個英國人。申先生擺平的是英國政府。贏英國政府搭仔贏一個英國人，是完全不同的兩樁事體。

事體的起頭，是阿寶勒拉租界里買了一塊地皮。又勒拉伊塊地皮朗廂造了一座戲院，叫做天北舞台。阿寶本來是想叫天寶舞台，後來他的一個相好對他說，天寶只含有你阿寶一個人的意思，勿如叫天北舞台更加大氣。天北拿所有格江北人全部暗含勒拉裡頭了。阿寶想想有道理，就改成了天北舞台。舞台造成之後，生意交關好。阿寶頭腦也靈活，請了上海灘朗各路名伶，上台做戲。京戲請過麒麟童周信芳，申曲請過最有名的小生筱文濱。筱文濱一出《庵堂相會》做得是嘸沒閑話講哦。他唱的《劉致遠敲更》，更是申曲一絕。伊日夜裡廂，我就是聽完他的《劉致遠敲更》，跑到後台去搭仔他嘎山湖（聊天）。我是勒拉筱文濱到申公館裡唱的一次堂會朗廂，認得他哦。大家都是本地人，說起閑話來蠻投緣哦。

也就是格日仔夜裡廂到後台去搭仔筱文濱嘎山湖，聽他說起來，格只舞台演不長了。我問他為啥事體。他說，阿寶的天北舞台可能要拆脫，英國人要收回這塊賣給阿寶的地皮。我大吃一驚，問他，英國人哪能可以拿賣出來的地皮再收回去呢？筱文濱搖搖頭說講，勒拉租界里，當然是英國人講啥就是啥，中國人弄不過伊拉哦。彼此勒拉格能講哦辰光，阿寶垂頭喪氣走進來，證實了筱文濱講的事體。平常辰光威風凜凜的阿寶，迭個辰光像煞是被霜打過一樣，皺起仔格眉頭，看牢仔地板發獃。我問他，格么儂就格能算數了？阿寶抬起頭講，我阿里肯格能算數？可我又阿里搞得過英國人？清朝皇帝都拿英國人沒得辦法，辣塊媽媽！阿寶說得差點哭出來。我看他可憐，不由衝口而出：搭伊拉上，儂要是弄不過，我叫申先生幫儂出頭。阿寶眼睛一亮，申先生肯不肯出頭？我拍拍胸脯，我去搭申先生講。頓時立刻，阿寶拉我跳上他的車子，叫司機直奔法租界。

當時的上海灘朗廂，最為流行的一句閑話就是：有事尋申先生。阿寶雖然認得申先生，但他嘸沒把握，申先生肯不肯替他出頭。後來，阿寶自己私底下告訴我，其實，他前頭已經尋過金老闆，被金老闆婉言謝絕脫。我雖然嘸沒事先問過申先生，但我有把握，申先生不會得袖手旁觀。果然，聽阿寶一講，申先生馬上安慰他：儂不要急，讓我想想辦法看。

第二天，申先生為此特意約金老闆搭阿木林一道商量。金老闆的意思是，格樁閑事蠻難管哦。阿木林相反，要給英國人看顏色。金老闆當場挖苦他，啥個意思？儂想做林則徐啊？阿木林回答：林則徐敢燒鴉片，阿拉為啥不敢殺脫他幾個紅頭阿三？金老闆冷笑一聲，林則徐燒鴉片，拿好幾座城市白白里燒給了英國人。要是你敢殺紅頭阿三，說不定，會把整個上海灘全部殺給英國人。你相信不相信？眼看兩人要吵起來，申先生立起來阻止了他們。等他們兩個的眼光齊刷刷地盯牢申先生的辰光，申先生慢條斯理格開口了。

申先生講，這樁事體是要管一管哦。但是勿能用拳頭去管，要用英國人的辦法去管。英國人是生意人，儂搭他一打仗，他馬上會得想辦法從戰爭當中獲取利益。英國人的仗打得越多，殖民地就越大。所以用拳頭不是個辦法。根據我搭仔英國人打交道的經驗，申先生講，英國人最怕格是打官司。啥個道理？英國人的司法系統，搭仔阿拉中國人完全不同。阿拉的司法是政府控制哦，英國人的司法，是完全獨立哦。英國人搭仔英國政府對司法的服貼，就像阿拉供奉城皇廟裡的城皇老爺。對付英國當局最好的辦法，就是利用英國的司法系統。這樁地皮買賣，是英國人的工部局管哦。好，就告工部局。請到好的律師，準備訴訟。迭格可能是最好的辦法。

申先生說完，金老闆拚命搖頭，阿木林冷笑個不停，像煞勒拉聽《天方夜譚》故事。但他們知道，申先生決定了格事體，非做不可哦。

講起來有點好笑，申先生告訴阿寶迭個決定的辰光，阿寶都不敢相信。阿寶嘸沒想到申先生會採用迭個辦法。阿寶似乎是看勒拉申先生的能力、搭仔聲望朗廂，輕輕點了點頭。接下去又馬上表示，他阿寶恐怕財力有限。因為迭場官司打起來勿會得馬上見分曉哦。申先生朝他笑笑，勿要怕得哦，有我。得到申先生格句閑話之後，阿寶馬上眉開眼笑。阿寶曉得，不管格場官司結局哪能介，只要有申先生撐勒後點頭，啥人要想拆脫天北舞台，就嘸沒介能便當（容易）了。

格場官司打了將近一年。先打到英國領事館，被領事館否決脫。然後打到英國大使館，又被大使館否決脫。最後打到英國倫敦的皇家最高法院，最高法院判決阿寶勝訴。天北舞台非但不倒，阿寶還得到十幾萬大洋的賠償費。阿寶激動得來，勒拉申先生面前眼淚鼻涕落個勿停，哭出烏拉哦講，辣塊媽媽，英國佬的法律比包公還要包公。我當時勒拉旁邊也差點落眼淚。要曉得，迭個是上海灘朗廂破天荒頭一趟：中國人搭仔英國政府打贏官司。上海的報紙，爭先恐後做報道。阿寶成了英雄，申先生更加是名重如山。

事成之後，阿寶千恩萬謝。先是拿了一大筆鈔票去謝申先生，被申先生謝絕脫了。後來又要謝我。我也勿願意接受。申先生給任何人排憂解難，從來勿接受人家格回報。我告訴阿寶，我是替申先生做事體哦，勿可以壞脫申先生定格規矩。聽我格能一講，阿寶只好算了。但是，幾年之後，阿寶還是尋了個機會，給了我一個老大的回報。伊個辰光，阿寶勒拉虹口、匣北一帶，替東洋人做事體。我正好有批貨色，勒拉虹口被東洋兵攔牢。是好幾卡車的貨色，里廂頭偷藏仔給新四軍買的槍支彈藥。要是被東洋人發現，我是無論如何活不成哦。就勒拉千均一發的辰光，正好阿寶到場。他連忙搭東洋人打招呼。東洋人對阿寶倒是深信勿疑，笑嘻嘻哦點了點頭，放阿拉走路。後來我才曉得，當時是三弟只浮屍，一看苗頭勿對，連忙給阿寶打了個電話，搬來救兵。當然啰，阿寶過來一看就明白了，卡車裡裝的，肯定是違禁貨色。迭個裡廂頭格名堂經，外行人是不懂哦。一般人只曉得給東洋人做事體，就是漢奸。實際朗廂，勒拉關鍵時刻，中國人總歸幫中國人哦。格類故事多得是，以後再慢慢交搭儂講。

當然，如果這樁事體碰著哦的是英國人，結果可能完全不一樣。東洋人有吧地方搭中國人還是有點介像哦，熟人朋友之類的面子，總要講一點哦。不過東洋人蠻橫起來，一點道理都不講哦。申先生對付東洋人搭仔對付英國人的路子，是完全不一樣哦。搭英國人可以通過打官司贏伊拉，但是搭東洋人打交道，有辰光是嘸沒辦法講道理哦；一定要狠過伊拉一頭，才能叫伊拉服帖。一、二八淞滬抗戰的辰光，東洋人的部隊要借道法租界。申先生曉得之後，馬上給法國領事打招呼：無論如何，不許讓東洋人通過法租界。嘸沒想到，法國人邪氣狡猾，既不想得罪申先生，又不想得罪東洋人。法國人聯合仔英國人、美國人一道，通知上海市政府代表，上海各界代表，還有東洋人的代表，一道去開調停會議。因為事體是申先生做出來的，所以申先生成為中方的首席代表。幾方面談了老半天，談不出理想的結果。東洋人一定堅持，要通過法租界去打阿拉格十九路軍。法國人、英國人和美國人都不肯表示強硬態度。最後，申先生光火了，他噌一下立起來，手指朝大家划了一圈，大聲講：今朝我申常德拿閑話講勒拉前頭，到辰光不要講，我事先嘸沒打招呼。如果東洋軍隊一定要經過法租界打十九路軍，我申常德不等東洋軍隊通過，就叫法租界全部毀脫。申先生講完，抬頭挺胸離開會場。申先生走出去格辰光，下底頭格人，拿經過向等勒門外的民眾一講，大家馬上向申先生歡呼起來。申先生坐進車子里，不斷向歡呼的民眾招手致謝，看上去像個國家元首一樣哦。

申先生的強硬態度，最後見效了。東洋人不敢搭申先生硬碰硬，非但嘸沒借道法租界，就連原來已經進入法租界的部隊，也全部撤退回去。東洋人勿像英國人格能講道理，但是東洋人服帖比伊拉更加不怕死的人。就像申先生講的，儂東洋人要搭我狠，我就狠過儂頭。儂不怕死，我比儂更加不怕死。格能介一來興，東洋人只好吃癟。

東洋人勒拉上海灘朗廂，頂頂服帖的中國人，就是申先生。東洋人動足腦筋，拉攏申先生。申先生就是軟硬不吃，紋絲不動。阿木林就不來事了（不行）。東洋人稍許丟了點甜頭給阿木林，阿木林居然就上鉤了，勸都勸不牢。申先生搭阿木林橫講豎講，告訴他，替東洋人做事體，要吃苦頭哦。阿木林不聽。結果，阿木林苦頭吃到仔南天門。伊個辰光，上海灘朗的局勢，極其複雜。各種勢力攪到一道，分不清啥人是啥人。每次一場混戰下來，總要死脫不少人。阿木林看不清山水，軋不出苗頭，最後出送，連性命都送脫。

東洋人打進上海之後，申先生只好退居香港。東洋人野蠻起來，啥個事體都做得出來哦。申先生堅決不答應替伊拉做事，遲早要被東洋人做脫。申先生當時的處境邪氣危險，最後只好離開上海灘。申先生臨走之前，託付阿拉兄弟兩家頭一樁大事體。當時辰光，大佬倌正好從華山下來，回到上海嘸沒多少辰光。申先生看見他回來，喜出望外，拍拍他的肩膀，老開心格講：儂來得正好，來得正好。申先生原來已經計劃好，讓阿拉兄弟兩家頭，替他搭仔年初三一道做生意。年初三姓年，名書山，我一直叫他年初三。頭一趟見面，我就感覺迭個年初三大有來歷。果然，後來我曉得了，年初三是共產黨的一個大腳色。

申先生拿格能重要的一樁事體，交給阿拉兄弟兩介頭，不是一般的信任。這樁事體講起來不過是一筆筆的生意，實際朗廂，是邪氣微妙的政治沙蟹（一種賭博）。做這樁事體，光有生意頭腦是不來事哦，還要會得搭仔各方各派周旋。如果格樁事體交給只曉得賺鈔票的人去做，可能會做得一塌里糊塗。申先生曉得伲盧家門裡的人，生意做得再興隆，也不會鑽到銅鈿眼裡去。我開麵粉作坊的阿爸，也算得是個有銅鈿的小老闆了；對我娘是過頭一點，不過對朋友手頭邪氣闊綽。其實迭個也是阿拉本地人的特點：隨便做啥個事體，派頭大得不得了。阿拉本地人，搭仔伊拉寧波人，做事體方式完全不一樣。比方講，請人家吃飯。寧波人擺到檯面上的菜肴，全部是小盆子小碟子，里廂裝一點點鳥食一樣的斷命么事；嘴巴里還要不停格講，小菜嘸高（不多），飯吃飽。阿拉本地人從來不搞格套花頭。請人家吃飯，總歸像像樣樣，一檯子菜肴，擺得來拍拍滿。碰到大事體，行做流水席。人一到齊就開飯，吃到吃勿下去為止。有辰光碰到做特別大格事體，要吃幾日幾夜哦。本地人做起事體來的氣魄，是其它地方的客幫人根本不好比哦。申先生手底下各個地方來的人都有，但他心底里最信得過哦，還是自家本地人。

申先生介紹阿拉兄弟搭仔年初三見面的辰光，在場的只有申先生、年初三，搭仔伲兄弟兩家頭，總共只有四個人。格能的場面，邪氣少見。我一腳踏進去，一看就曉得了，格趟做格不是一般的生意。就像民國十六年的格樁大事體，影響了申先生一生；伲兄弟兩家頭搭年初三打格交道，同樣改變了伲兩家頭的命運。唉，迭個短命格年初三，真正叫做，成也年初三，敗也年初三，好壞全部勒拉迭個年初三。