TVB已經沒得救了？10年前倉底貨接檔《撒嬌》！女版《監獄風雲》即將上演

TVB熱播劇《不懂撒嬌的女人》進入結局篇，大家本來開開心心好期待下一部新劇，點知，希望越大，失望越大。

遺憾咁同大家講聲係冇「新戲」，只有舊到冇得再舊嘅倉底貨。

之前都試過係咁，《流氓皇帝》、《巾幗梟雄之喋血長天》、《末代御醫》都係咁臨時抽起，有傳係因為啲演員準備約滿，唔想再拍新劇，所以TVB就抽起啲舊劇。

本來係由《三個女人一個[因]》接檔《不懂撒嬌的女人》，但係突然間比人抽起咗，改播2007年拍嘅倉底貨《蘭花劫》接檔，真係嚇親一直睇TVB大嘅fans！

《三個女人一個[因]》係由黃智雯、袁偉豪同陳智燊三位主演，但係抽起原因真係唔知，本來個個都期待，新劇，點知又係播啲舊嘢，真係奇怪。

// 新劇慢過「烏龜賽跑」

而TVB真係越嚟越奇怪，自從2015年決定將每晚9：30播嘅劇集由周一至周五變為連播7日之後，可能係因為播劇速度太快，拍劇速度依然係咁慢。

所以劇集存貨減少咗，而且每年都至少播一部外購劇湊數填補檔期，結果都係唔掂，咁唯有係倉底貨裡面搵滄海遺珠。

依家TVB整容面當道，有冇演技嘅有線幫，或者花瓶港姐，一唔係就嗌啲退咗休幾廿年啲人翻嚟拍，啲觀眾早就睇厭曬啦，叫啲舊面孔耐冇蒲頭又唔同，特別係型男俏女就更加歡迎啦，可能就係咁樣播舊劇。

講翻部倉底貨《蘭花劫》，其實評價都唔錯。

原本部劇叫《獄焰驚情》，後來先改名叫《蘭花劫》。

// 型男俏女做主演

睇封面圖就知，非常有看點，全部都可以話係老戲骨，由蘇玉華、田蕊妮、唐寧三位女主角，仲有陳錦鴻主演。

而三位女主角中，其中兩位已經離開咗TVB，只有田蕊妮係到，並且正式成為TVB嘅經理人合約演員，仲一躍成為視後。

唐寧早就離開咗TVB去內地發展。不過依家好似半息影狀態，好少拍戲，專心湊仔，升級做媽咪。不得不說唐寧真係童顏，依家依然都係咁靚。

而蘇玉華都係甚少拍戲，除咗2014年《載得有情人》，好似就冇點見過佢嘅身影，多數都係拍舞台劇多。

陳錦鴻就夠曬偉大，為咗自閉症仔仔退出演藝圈，全身心投入照顧佢，佢仲好爭氣摞咗全級第一名；佢冇拍戲依幾年，觀眾都好掛住佢，如今都算係「復出」，大家都好期待。

咁多好戲之人拍嘅劇，相信應該唔會差得去邊，已經睇過部劇嘅人，評價都唔錯。

題材大膽創新，故事都十分曲折迂迴，即使唔係高清拍攝，但係都值得一睇。

// 大姐殺二姐，二姐殺細妹

部劇係香港第一所監獄——中環域多利監獄取景，以民國初年嘅上海為故事背景。

主要描述早年失散嘅三姊妹間恩仇愛恨，以人性陰暗同善良嘅一面作對比。

田蕊妮——江麗雅（大姐）

蘇玉華——炎沛湖（二姐）

唐 寧——蘇 菲（細妹）

用女人之間嘅爭鬥為主要，劇中三姊妹性格都極為鮮明，大姐為人憨厚，細妹受過良好教育，為人黑白分明，而二姐心狠手辣。

劇中以二姐角色來凸顯人性嘅醜惡同社會黑暗。二姐為咗達到目的，不擇手段，不惜要姐姐替自己坐監，害死養母之餘甚至親手殺死自己嘅妹妹！冷血、殘忍，令人覺得十分壓抑。

所以部戲其實就係「老大殺老二，老二殺老三。」

《蘭花劫》結局唔係以往好人一定好報嘅傳統大結局。

而係有很多遺憾，盡情地講出人性與生俱來嘅貪念同自私，但係人畢竟有善良一面，於是劇中表露出惡與善之間嘅鬥爭。

// 女版《監獄風雲》

諗起發哥嘅《監獄風雲》，同依部《蘭花劫》有啲相似。

1.人設上

同樣係三個主角，《監》兩個好人，一個壞人。發哥飾演嘅係一個因為爛賭錯殺老婆嘅監犯，而梁家輝飾演嘅係一個設計師，因為同滋事分子打架錯手殺人，所以被判入獄；而壞人就係張耀揚飾演典獄長，非常痛恨犯人，所以睇佢地兩個唔順眼。

《蘭》同樣都係大姐同細妹係好人，二姐就係壞人。

2.劇情上

一邊係兄弟情深，另一邊係姊妹情深；發哥同梁家輝兩個人共同對抗典獄長，結成患難之交。大姐同細妹為咗救二姐出獄，而四處奔波，都係十分感人。

兩部劇同樣揭示咗人性善惡美醜，同社會嘅陰暗面。

3.背景上

《監》係喺80年代末，香港未回歸祖國懷抱之前嘅時候，作為故事背景。嗰個年代，社會狀況極度混亂，黑社會當道，所以係獄中爭鬥頻繁。

《蘭》係以民國初年嘅上海法租界作為故事背景。環境相對冇咁複雜，民法相比較齊全，社會各樣都處於改革當中。

講咗咁多《蘭花劫》，係倉底貨就算啦，起碼都算係部良心劇，值得期待下。但係千其唔好以為觀眾咁易話為啊，啲倉底貨唔係下下都係良心劇嚟噶，想要好收視率，就好好地拍

推薦閱讀：