廣東人神奇藥水，隨便一支都可以加無限藍buff？

大家都知，廣東天氣真系好難頂！

一年四季變幻莫測都算啦，最近幾日仲大雨同暴晒隨機發放，搞到暴雨預警同高溫預警同時發布，於是有咗個新段子——

話唔埋邊日廣東落嘅唔系雨，而系滾水！直接就白灼咗廣東人，咁福建人可以一報以往之仇！

廣東天氣咁惡劣嘅情況下，廣東人系點生存到依家？

除咗靠一身嶺南正氣，仲多得一系列神奇藥水，佢哋就系廣東人嘅特級「藍爸爸」。

**本文所講述嘅藥油藥水額外用處收集自網友意見，大家請根據自身情況出發，不要輕易嘗試。

雙飛人

【官方宣稱效用】用於痾嘔肚痛、蚊蟲叮咬、湯火灼傷、驅風救急、舟車暈浪、除菌除味等用途，外塗內服均可。

神奇之處

香港雙飛人官網亦曾宣稱雙飛人可以用作調味品，喺朱古力蛋糕滴兩滴，即可變成薄荷朱古力蛋糕。

據說，真系有唔少香港網民試過，仲有人試過滴落奶茶、檸茶、蒸魚、朱古力奶、湯等等。

藿香正氣水

【官方宣稱效用】用於外感風寒、內傷濕滯或夏傷暑濕所致的感冒，症見頭痛昏重、胸膈痞悶、脘腹脹痛、嘔吐泄瀉，腸胃型感冒。

神奇之處

根據阿爆所講，可以醫痔瘡，當我問到具體點用，佢就唔肯講啦……

風油精

【官方宣稱效用】清涼，止痛，驅風，止癢。用於蚊蟲叮咬及傷風感冒引起的頭痛，頭暈，暈車不適。

神奇之處

後來有個網紅嘗試用風油精做不可描述嘅事……

後邊發生嘅事，你哋都知道啦。

黑鬼油

【官方宣稱效用】用於濕痛骨痛、跌打腫痛、頸緊膊痛、肌肉酸痛、坐骨神經、新舊積痛。

神奇之處

嶺南藥廠創始人喺祖傳紅花油嘅基礎上創製嘅強效黑色藥油，受到皮膚黝黑嘅勞工所喜愛，故被人戲稱為「黑鬼油」，不過依家就比較少見啦。

與紅花油相比，黑鬼油適應症更廣，就算傷口出血亦可使用。如有風濕關節炎，下肢靜脈曲張，都可用黑鬼油加水嚟浸腳，效果顯著。

驅風油

【官方宣稱效用】祛風止痛、芳香通竅、本品用於傷風噴嚏、鼻塞頭痛、舟車暈浪、跌打扭傷、肌肉酸痛、蚊蟲叮咬。

神奇之處

有人話，驅風油可以用嚟戒煙，食煙之前滴兩滴喺最入邊，食煙嘅時候有助於提神醒腦，降低食煙慾望，再食第二支煙嘅時候，會覺得口苦，有助於戒煙。

紅藥水

【官方宣稱效用】消毒防腐葯。用於表淺皮膚黏膜創面消毒及手術前局部消毒。

神奇之處

有啲廣東家長，當自己嘅仔女出水痘，就會搽紅藥水，會好得比較快。但其實紅藥水含有汞，不適宜用於消毒大面積傷口，容易造成汞中毒。

X花油

【官方宣稱效用】四大花油，各有用處！蚊蟲叮咬、四時感冒、跌打損傷、腰肌勞損，乜都得！

神奇之處

呢四種花油，喺老一輩人眼中幾乎都系萬能，無論咩大病小痛都可以用，我仲有個問題，點解廣東人乜花都可以用嚟做藥油！

豉油

【官方宣稱效用】佢就系一種調味料啊……

神奇之處

從細到大，老人家一直都話燙傷燒傷就搽豉油啦，豉油就被傳為民間燙傷膏！

但事實上豉油含有油份，會降低散熱令傷口惡化，更有可能將細菌帶入傷口，引起眼中發炎。所以呢種方法真系唔可以用！

由於以前物質匱乏、平民冇錢睇醫生，加上商家吹捧，好多藥油藥水被賦予咗大量神奇功效，有啲功效甚至已經脫離現實，誤用會危害身體健康。

所以大家都系理智啲，唔好盲目相信民間偏方同講法，有病最好都系去醫院檢查下啦！

當你頭暈身?嘅時候，

你阿媽會畀咩神奇藥水你用啊？

素材出自各位自己友提供~

羊城網負責整理編輯