精選台語繞口令

台語繞口令，一般稱作「緊喙唸」，又稱「盤喙錦」，嘛叫「箍喙舌」，類似國語的「順口溜」，也類似「打油詩」。其實就是利用同聲、同韻、同調之「咬嘴(喙)的話」來訓練口才，收集如下…(不同於四句聯、七字仔、數來寶…)

※打馬膠，黏著跤，叫阿爸，買豬跤，豬跤箍仔，焄爛爛，枵鬼囡仔流喙瀾。

※一年啊悾悾，二年的孫悟空，三年的吐劍光，四年的愛膨風， 五年的上帝公，六年的閻羅王。

※白鴒鷥，捙糞箕，捙到溪仔墘，跋一倒，抾著兩先錢。一先儉起來好過年，一先買餅送大姨。

※一二三四驚著無代誌囝仔人褪裼無代誌，土地公伯會來保庇，保庇你細漢好育飼，保庇你大漢會順適。

※一二三，阿婆去洗衫，四五六，阿婆去斗六，七八九，阿婆去海口，十、十一、十二阿婆沃雨走袂離。

※一放雞，二放鴨，三分開，四相疊(撲)，五搭胸，六撲手，七紡紗，八摸鼻，九扭(咬)耳，十槓(撲)腳，十一仔摸塗腳，十二仔攏總捎(sa)。

※姑欠索，欲共嫂鉸索。嫂無鎖，欲共姑借鎖。嫂講伊有索，叫姑來鉸索。姑講伊有鎖，叫嫂來提鎖，提索換鎖。

※桌頂一支刀仔，一粒桃仔，舉刀仔切桃仔，毋通切著桌仔。

※搖仔搖，搖仔搖，搖到內山去挽茄，挽若多？挽到一飯蘺，也好食，也好賣，也好予嬰仔做度睟。

※樹頂一隻猴，樹跤一隻狗，猴仔跋落來 硩著狗，猴也走 狗也走，毋知是狗驚猴，抑是猴驚狗。

※小隆寫批，船仔歕鼓吹，阿伯仔摸田螺，船仔是阮的，弟弟無食飯，姊姊真毋甘，目睭瞌瞌，明仔載請人客。

※一隻猴仔真正爻，帶一群猴仔去溝仔；一隻猴仔跋落溝，迄隻猴仔，轉來提鉤仔來鉤猴仔。

※一鼠賊仔名，二牛駛犁兄，三虎爬山棚，四兔遊東京，五龍皇帝命，六蛇互人驚，七馬走兵營，八羊食草嶺，九猴爬樹頭，十雞啼三聲，十一狗顧門埕，十二豬是菜刀(真好)命。

※坐大船看海湧，坐飛行機看雲頂，坐火車看風景，坐牛車挽龍眼，坐跤踏車捙跋反，坐高鐵時間上界省。

※喂喂喂，台灣出甜粿，甜粿真好食，台灣出木屐，木屐真好穿，台灣出鵁鴒，鵁鴒會講話，台灣出棉被，棉被蓋會燒，台灣出芎蕉，芎蕉真大枇，台灣出蕃薯，蕃薯真正好，台灣是寶島。

※大頭仔大頭仔生後生，後生生了賣肉羹；肉羹肉羹結規丸，大頭仔講伊欲賣肉圓肉圓歹吃無人買，大頭仔想欲賣碗粿；碗粿碗粿冷吱吱，大頭仔氣著賣花枝花枝花枝真臭臊，大頭仔換來賣米糕；米糕米糕燒滾滾，大頭仔講伊欲賣米粉米粉米粉滾袂爛，大頭仔毋知欲按怎 欲按怎？

※一個囡仔佇咧吼，雄雄看著一隻狗，囡仔起跤走，跋倒捙畚斗，阿娘佇外口，糴米糴一斗，轉來欲煮晝，看到囝仔吼，囡仔一面哭一面吼，無愛食中晝，怹娘竹仔枝一下到，趕緊起跤走一時心情亂糟糟，莫擱吵，莫擱拗，趕緊轉去厝裡食中畫。

※和尚弄破鼓，提褲來補鼓，鼓破 褲補；褲破 布補，唔知是布補褲，抑是褲補鼓。

※西北雨，滴滴落，鯽仔魚要娶某，鮕玳兄，打鑼鼓，媒人婆，土虱嫂，天色暗，尋無路，趕緊來，火金姑，做好心，來照路，西北雨，滴滴落。

※火金姑來食茶，茶燒燒食芎蕉，芎蕉冷冷食龍眼，龍眼會開花，匏仔換冬瓜。 冬瓜好煮湯，匏仔換粗糠，粗糠愛起火，九嬸婆仔爻炊粿，炊佮臭火焦兼著火。

※一的炒米香，二的炒韭菜，三的沖沖滾，四的炒米粉，五的五將軍，六的六子孫，七的分一半，八的爬上山，九的九嬸婆，十的撞大鑼。打你千，打你萬，打你一千又一萬，羞羞羞袂見笑，臆輸毋甘願，耍輸起蝦龜，毋甘願起蝦龜，我欲來去投老師，投老師。

※點仔點仔點水缸，什麼人放屁爛跤尻。點仔點仔點冊包，什麼人有閒來阮兜。點仔點仔點茶壺，什麼人今暗欲娶某。點仔點仔點叮噹，什麼人今暗欲嫁尪。點仔點仔點鉛筆，你是歹囝白賊七。點仔點仔點紛紛，你是英雄去做軍。

※有一個人姓布(poo3)，手提一匹布，行到雙叉路，雄狂入當舖，當錢一千五，行轉雙叉路，買了一擔醋，擔轉雙叉路，看著一隻兔，囥落醋，趕了兔，掠著兔，褪了褲，包了兔，咬破褲，走了兔，囥落醋，趕了兔，偃(ian2)倒醋，亦無褲，亦無兔，亦無布，氣死迄個人 姓傅！

※今有「一個回仔一個開仔」佮「一個鎚仔一個開仔」欲把「鐵仔一個罐仔」開予開，是用「回仔一個開仔」等到「鐵仔一個罐仔」開開開，猶是用「鎚仔一個開仔」開「鐵仔一個罐仔」彼個「鐵仔一個罐仔」才會開開開。

※做人的新婦著知道理，晏晏(uann3)去睏著早早起，又擱煩惱天未光，又擱煩惱鴨無卵，煩惱小姑欲嫁無嫁妝，煩惱小叔欲娶無眠床。做人的新婦著知道理，晏晏去睏著早早起，起來梳頭抹粉點胭脂，入大廳拭桌椅，踏入灶跤洗碗箸，踏入繡房繡針黹(tsi2)。 做人的新婦擱也艱苦，五更早起人嫌晏，燒水洗面人嫌燒，白米煮飯人嫌烏，氣著剃頭做尼姑。若是娶著彼落歹新婦，早早著去睏，晏晏擱毋起床，透早若是佮伊叫起，著面臭臭，頭鬃又擱揹塊(teh)肩胛頭，柴屐又擱拖塊胛脊後，著矻矻硞硞(khit-khok)矻矻硞硞，起來罵乾家官(ta-ke-kuann)是老柴頭。

※初一早，初二巧，初三睏到飽，初四接神，初五隔開，初六挹肥，初七七元，初八順星(完全)，初九天公生，初十有吃食席，十一請子婿，十二查某子轉來拜，十三食暗糜配芥菜，十四結燈棚，十五上元暝，十六相公生。

※古早台灣人十戇第一戇　種甘蔗予會社磅　第二戇　食薰歕風害健康第三戇　惦路邊看喝玲瓏　第四戇　食檳榔四界嘔紅第五戇　飲酒醉來吐劍光　第六戇　喪事請五子哭墓第七戇　食毒販毒賜死康　第八戇　三字經罵人祖公第九戇　選舉替人四界傱　第十戇　跋筊提錢予人東

※台語演講會十憨第一戇　無時閒姑不而將　第二戇　交錢了後人失蹤第三戇　坐佇台跤搧東風　第四戇　徛佇台頂毋敢講第五戇　跤手慢擱無主動　第六戇　無準時來硞硞傱第七戇　無照手冊烏白摸　第八戇　愛人服侍若祖公第九戇　講話定定無信用　第十戇　無堅持著無成功