『熟語學堂』秋兮木樨，蒸郁蘇城，蘇州話談「木犀蒸」
桂花個木質紋理賽過犀牛角，宋人就叫俚木犀，後首來又有人加仔樹木偏旁，就有仔伲現在「木樨」二個字。蘇州人講著桂花，還是歡喜叫俚「木樨花」。
音頻不見了GG，看微信的原文吧！
宋楊萬里有《木犀》詩云：「天將秋氣蒸寒馥，月借金波滴小黃。不會溪堂老居士，更談桂子是天香。」
每年到農曆八月份木樨花開個辰光，總歸有幾日天懊糟熱得弗得了，賽過三伏天勒海，蘇州人就稱之為「木樨蒸」。民間有俗語葛：「火燒七月半，八月木樨蒸」，講個就是該個現象。
木樨花喜溫熱好濕，勒海該場蒸熏個日腳里向就全部儕開開來哉，一夜天好勒，滿城蘊香。
周瘦鵑有詩云：「中秋準擬換吳綾，偏是天時未可憑。踏月歸來香汗濕，紅閨無奈木樨蒸。」
清顧祿《清嘉錄》：「俗呼岩桂為木犀，……將花之時，必有數日鏖熱如溽暑，謂之「木犀蒸」，言蒸郁而始花也。」
前兩日天木樨蒸起來個辰光是香熱煞人也熱煞脫人，搭小朋友講起來個辰光倒是發現，伲讀音弗大一樣葛。
我么一徑讀個是「木西蒸」 「moq si tsen」，俚讀個呢倒是「木屑蒸」 「moq siq tsen」。後首來我亦想想，像煞搿個入聲個的倒也是聽著過歇葛。
伲就去諮詢仔幾個群友，穩下來發現像煞古城區儕讀個是「木西蒸」 「moq si tsen」，郊區讀「木屑蒸」「moq siq tsen」比較多點。
也會有點方會拿「木樨蒸」直接叫「桂花蒸」葛，張愛玲有本小說，叫《桂花蒸阿小悲秋》，開頭就有寫著個：「秋是一個歌。但是桂花蒸的夜，像在廚里吹的簫調，白天像小孩子唱的歌，又熱又熟又清又濕。」
《桐葉偶書》：岩桂俗名木犀，節候至此，重又喧和，謂之木犀蒸。（案：邑人謂桂花蒸。）
當然啦，弗管是「moq si」還是「moq siq」 ，「木樨蒸」還是「桂花蒸」，總歸儕是秋老虎個絕唱了。
歡迎關注我們的微信公眾號：蘇白學堂
也歡迎大家來QQ群以及予安的微博互動呀~
推薦閱讀：